Ms.V شيو وي - CGTN Lan لانا ببكين - Suad Ye - فيحاء وانغ - Ayisha Elseenya عائشة الصينية - Assia آسيا
الموضوع دة اتكلمت عنه في من اكتر من سنه قبل ما الفيسبوك يكتشفة و يعلم عليهم زي ما هتعرفوا لما تكملوا قرأة
الصيـــن .. الصين بتعمل مجهود غير طبيعي لغسل صورتها امام العالم بخصوص جرايمهم ضد الايغور المسلمين و الي من ضمن الانتهاكات الي بيتعرضولها:
- احتجاز أكتر من مليون شخص من أقلية الإيغور في ما تسمة الصين "مراكز او معسكرات مكافحة التطرف" وهي في الحقيقة معتقلات شديدة الحراسة
- إجبار نساء الإيغور على تناول حبوب منع الحمل وإخضاعهن لعمليات تعقيم قسرية لحرمانهن من الإنجاب نهائياً.
- فصل الأبناء عن أسرهم بعد وضع الأباء والأمهات في هذه المعسكرات.
- أمروهم بتسليم جميع المصاحف وسجّادات الصلاة أو غيرها من المتعلقات الدينية، وإلا يتم عقابهم وغيرها كتير من الانتهاكات و تطهير عرقي وتغير لهويتهم الدينية و ديمغرافية الاقليم الي عايشين فية
هسيب روابط لمصدار صحفية في اخر الصفحة للي مهتم يعرف اكتر
المهم نرجع لموضوعنا .. الصين بتحاول تغسل صورتها بأي طريقة وبتدفع فلوس كتير جدا في دة
من اكتر من شهر ظهرلي اعلان لبوست من صفحة الاستاذة "لي" الي بتشتغل في شبكة تلفزيون الصين الدولية
الاستاذة عاملة نفسها رحالة وبلوجر وعمالة تنشر بوستات عن قد اية المسلمين بيتمتعوا بحرية في الصين وعاملة صفحة علي الفيسبوك الي هو اصلا ممنوع في الصين والصفحة عليها اكتر من ٢ مليون ونص شخص
وساعتها لما دخلت علي الصفحة لاقيتها عاملة إعلانات من سنة شغالة ومستمرة .. تمويل حكومي بقى!
الحلو ان فيسبوك مؤخرا علم علي الصفحة انها صفحة إعلامية تحت تحكم الدولة الصينية
وبرر دة لانه شاف ان طريقة بوستاتها ومصدر الفلوس الي بتحطها في الاعلانات وحجمها
طبعا حاليا وقفت الاعلانات .. مابقاش ليها لازمة بعد ما انكشفت
بعد كدة اكتشفت عدة صفحات بالعربي لصينيات بيقوموا بنفس المهمه ولاقيت الأتي:
١- كل الصفحات معمولة في ٢٠١٩ .. صدفة؟!
٢- الفيسبوك اصلا ممنوع في الصين اية الي يخليهم يغامروا ويدخلوه ويعملوا صفحات عليها ملايين البشر بإعلانات ممولة تمويل كبير جدا!
٣- كلهم ستات او علي الاقل الـ ٦ الي وصلتلهم وانا اعتقد بشدة ان كلهم هيكونوا ستات خصوصا الموجهين للمنطقة العربية ودة غالبا بسبب الشباب
٤- مش لازم يتكلمو خالص عن قضية الايغور *دلوقتي* لكن في منهم الي اتكلم وعملوا فيديوهات عن قد اية الحياة وردي مع مسلمي الايغور.
٥- الفيسبوك مُطلع علي معلومات اكتر مننا وقرر من مصدر تمويلهم و طريقة كتابة البوستات انهم جهة اعلامية خاضعة لدولة الصين *دي مش معانها انهم شغالين في قناة تليفزيونية صينية مثلا لا دي معناها انهم موظفين من الحكومة في "الخفاء الا لو اعلنوا دة" وبياخدوا تعليمات يتكلموا في اية دة غير فريق الميديا الي وراهم بيعدل الفيديوهات و يشتغل علي التصميمات.
٦- هيتضامنوا معاكم و يحطوا بوستات داعمه لفلسطين وفي واحدة منهم متصورة عند قبة الصخرة واحدة تانية متصورة مع رئيس فلسطين محمود عباس في زيارة للصين ودة يأكد انهم شغالين مع الحكومة وممكن كمان يشجعوا كورة معاكم اهلي و زمالك عادي جدا كل دة لكسب ثقتكم اكتر ودس السم في العسل.
٧- مهم تعرفوا ان البوستات دي مش ضد الشعب الصيني بل ضد الناس الي الحكومة الصينية موظفاهم لغسل صورتها امامكم بخصوص اي قضية هما حابين يتكلموا فيها.
٨- في منهم مسلمات اة لكن انا مش فاهم ازاي في ناس لسة بتتخدع في حد لمجرد انه مسلم بعد ما شفنا مسلمين عرب بيدعوا للتطبيع الشعبي مع الصهاينة!
٩- مش بس انتو لازم تخرجوا من الصفحات دي وماتتفعلوش معاها نهائي لا لازم كمان تشوفوا اهلكم خصوصا الكبار منهم الي قاعدين ليل نهار علي الفيسبوك وبيتابعوهم بحسن نية.
١٠- هتلاقوا ناس عرب ساعات بيطلعوا معاهم في الفيديوهات والعرب دول عندهم صفحات و راشقين في الصين طول الوقت دول منهم الي مستورد وشغلة كلة من هناك او طالب وبيدرس اي كان هما مين مش هدخل في نيتهم لكن هما بكل تأكيد عارفين انهم بيتعاملوا مع عملاء للحكومة الصينية وبيساعدوهم يوصلوا للجمهور العربي اسرع.
١١- هتلاقوهم بينزلوا صور لمساجد من هناك، هتلاقيهم منزلين صور ليهم في الاقصى ومؤيدين لفلسطين و بيحبوا العرب "ماحدش بيحب العرب الا لو لية مصلحة خلينا واقعيين" كل دة كذب وشغل اشبة بشغل المخابرات *الصور حقيقية لكن هدفهم كاذب* وبيشجعوا رياضيين عرب وبيسمعوا موسيقي و بيحبوا افلام عربي كل دة شغل فقط و كل واحدة وراها فريق شغال علي البوستات الي بتنزل حتي لو ماتكلموش في المواضيع دي هما عملاء صينيهم هدفهم فقط تزييف الحقائق.
علشان ماحدش يفكر هل يعني العرب مهمين قوي كدة علشان يعملوا كل دة! .. لا و اة .. الموضوع مش مكلف نهائيا + ان دة اسلوب حياة الحزب الشيوعي الصيني وبيعملوا كدة داخل الصين اصلا بيجندوا مؤثرين علي الانترنت علشان ينشروا الي هما عايزين يوصلوا للناس .. مؤثرين من بتوع الميك اب و الاكل و الكلام
دول مش مجرد مواطنين شرفاء لا دول عملاء شغالين بمرتب حكومي كل شغلتهم ينتجوا محتوى يلهي العرب و يحببهم في الثقافة الصيني "الجزء بتاع الثقافة مش فارق معايا" الجزء الاهم هو ان شغلتهم يخلوكوا تصدقوا ان الصين بتعامل المسلمين كويس وان الاويغور دول ارهابيين وبيتم عقابهم او اعادة تأهيلهم علشان يكونوا مواطنين صالحين و دة طبعا كذب!
دة خبر عن نسخة انجليزي من نفس نوعية الناس دي .. الخبر من سنغافورا
خبر اخر عن نفس الفكرة من تايوان
ازاي الفيسبوك عرف انهم ممولين وتابعين للدولة الصينية؟
مشاهد غير مسبوقة لمراكز احتجاز الإيغور كشف عنها صيني تمكّن من تصويرها خلسة في إقليم شينجيانغ
قبل ما تخش تصلي العيد قول النشيد الوطني الاول
فيديو لرحالة عربي ممكن يبين جزء من الي الصين عملته في الاويغور
تقرير البي بي سي معتقلات الصين المخفية ما الذي جرى لمسلمي الإيغور المختفين في إقليم شينجيانغ؟
البي بي سي - الإيغور: شهادات محتجزات عن الاغتصاب الجماعي والتعذيب في الصين
البي بي سي الإيغور: "الثمن الباهظ لانتقاد الصين"
سي ان ان تقرير مهم بمستندات مسربة من الحكومة الصينية و شاهادات و صور اقمار صناعية
نيويورك تايمز فيديو مسرب من المعتقلات الصينية
أستهداف صانعي محتوى عرب لتبيض صورة الصين في المنطقة العربية و الاسلامية