كنت هكتب بوست طويل عريض اتكلم فيه عن صناع السينما والتلفزيون ومسابقات زي الاوسكار و الايمي في الغرب ازاي بيأثروا فينا و بيحاولوا يدخلوا قيم حقيره لحياتنا ومع الوقت بنطبع معاها لاننا اتفرجنا عليها كتير وبتبقى عادي و حريه شخصيه و كلام ماسخ من هذا النوع.
⠀
لكن لاقيت انه من الافضل اني ادخل في الموضوع بشكل مباشر.
⠀
انا مابتفرجش علي محتوى عربي افلام ومسلسلات وبرامج ترفيهيه تلفزيونيه من سنين طويله اكتر يمكن اكتر من ٨ سنين تقريبا لاني شايف ان معظم بكرر معظم مش كل .. المحتوى العربي يا تقليد غربي سرقه بالبوستر حتى يا محتوى هايف و في الحالتين فيه حرام كتير المحتوى نفسه يعني.
⠀
المحتوى الغربي معمول بضمير و بإبداع الصراحه و ساعات كتير بيناقش مواضيع مهمه (ليهم) لكنه ماليان حرام وبضمير برضوا، من سنين بدأت اتفرج علي مسلسل شخصيته الرئيسية (ابليس) طبعا قاصد ماقولش الاسم وياريت ماحدش يكتبه … الكلام ده في اخر ٢٠١٥ اول ٢٠١٦ قبل ما يتشهر، مع اول حلقه مافهمتش الموضوع قوي لكن اول ما فهمت ولاقيت انه ابليس و بيتكلموا عن ربنا و بيجسدوه سبحانه وتعالى انا بصراحه "قرفت حرفيا" من متابعته من الاول الحمد لله لانه حرام جواه حرام جواه حرام الي ما لا نهايه.
⠀
نفس الشيء لما بتفرج اي فيلم او مسلسل فيه مشهد بيتعدي علي سيدنا عيسى عليه السلام بالقول او التجسيد لان ده مشهور عندهم.
⠀⠀
- طيب ما ماتتفرجش نهائي علي اي فيلم او مسلسل احسن، ليه وجع الدماغ ده؟
ربنا سبحانه وتعالى ماخلقناش بزرار و ماحدش فينا يقدر يتوقف عن شيء غلط او صح عمله لمده كبيره فجأة.
⠀⠀
من حوالي شهر او اكتر جه في مخي الكلام عن الافلام و تزكيتها الي هو تتكلم مع اصحابك عن فيلم او مسلسل شفته و ترشحه ليهم يشوفوا وطبعا كلنا (اسف معظمنا) (اسف جزء مننا) مؤمن وعارف ان كل الافلام حاليا فيها حرام من اول لاخر دقيقه سواء غربي او شرق اوسطي او اسيوي.
⠀
فهل لما بنرشح لحد فيلم يشوفه بنلبس سيئات الترشيح نفسه و سيئات لما يتفرج ولو فرج حد معاه ولو هو رشحه لحد بناء علي ترشيحي! يلهوى!!!!
⠀
طلع دينيا انه ايوه بنلبس كله ده و الحسابه بتعد تحسب، طبعا كلنا سمعنا ان الحسنه بعشر امثالها و السيئه بمثلها يعني بتتحسب واحده فقط وربنا بيغفرها كمان. الي فات ده معني لحديث قدسي فعلا موجود.
⠀
بس ثانيه واحده تعالي هنا .. هو ترشيح الافلام للآخرين سيئه؟ لا الفرجه هي الي سيئه الترشيح ممكن يدخل في باب نشر الفساد في الارض، طبعا احنا مانقصدش ننشر الفساد بس كده خلاص احنا خرجنا موضوع السيئه بمثلها .. احنا مش فاسدين لا احنا بنكون مُفسدين بقصد او بدون قصد دي حسابها عند ربنا بس احنا عاقلين وكبار كفايه اننا نعرف الصح من الغلط.
⠀
وبكده بندخل تحت الآيه الكريمه ﴿ لِيَحْمِلُوا أَوْزَارَهُمْ كَامِلَةً يَوْمَ الْقِيَامَةِ وَمِنْ أَوْزَارِ الَّذِينَ يُضِلُّونَهُمْ بِغَيْرِ عِلْمٍ أَلَا سَاءَ مَا يَزِرُونَ ﴾
⠀
ايضا الحديث الشريف الصحيح
قَالَ رَسُولُ اللَّهِ صَلَّى اللَّهُ عَلَيْهِ وَسَلَّمَ : " مَنْ سَنَّ سُنَّةَ خَيْرٍ فَأُتْبِعَ عَلَيْهَا ؛ فَلَهُ أَجْرُهُ، وَمِثْلُ أُجُورِ مَنِ اتَّبَعَهُ، غَيْرَ مَنْقُوصٍ مِنْ أُجُورِهِمْ شَيْئًا. وَمَنْ سَنَّ سُنَّةَ شَرٍّ فَأُتْبِعَ عَلَيْهَا ؛ كَانَ عَلَيْهِ وِزْرُهُ، وَمِثْلُ أَوْزَارِ مَنِ اتَّبَعَهُ، غَيْرَ مَنْقُوصٍ مِنْ أَوْزَارِهِمْ شَيْئًا "
⠀
هنيجي يوم القيامه نبص نلاقي جبال من سيئات احنا ماعملنهاش بنفسنا لكن كنا سبب في ان غيرنا يعملها وكذلك حسنات هنستغرب جات منين دي!
⠀
انا مش بتكلم عن وثائقي عالم البحار ولا فيلم كرتون بيعلم الاطفال شيء مفيد ولا اي محتوى يفيد الانسان بدون حرام .. اعتقد واضح انا بتكلم عن انهي افلام ومسلسلات علشان ماحدش يقولي لا اصل في محتوى مفيد! فين في هوليود؟ هليود بتاعتنا ولا بتاعة المريخ؟ طبعا زي ماقولت الصناعه (الافلام و المسلسلات وبرامج التليفزيون) كلها علي الكوكب رايحه في داهيه اخلاقيا ودينيا.
⠀
علشان كل ما سبق مابقتش (من قريب) ارشح او اتكلم عن افلام او مسلسلات شفتها او اشير علي السوشيال ميديا اني بتفرج علي فيلم او اشير اعلان لفيلم او مسلسل وكفاية عليا سيئاتي الي بعملها بنفسي ربنا يتوب علينا جميعا ويطهر قلوبنا و يغفر ذنوبنا.