أفضل مسلسلات رمضان - عرفات الجاهل
بس شفت المسلسل متصور ازاي، الالوان تحفه ولا الموسيقى التصويريه ولا الحوار ولا اداء الممثلين! انا اكتر حاجه عجباني الحوار في المسلسل ده بغض النظر عن انه "بيزيف احكام الدين و بيخفيها و بيزود من عنده و بيروج لأفكار فرق اسلاميه منحرفه عن الدين الصحيح و بيبث في عقولنا ترك العبادات و ان التدين بيجي لواحده و عادي نجاهر بالمعاصي و اننا نصف ربنا سبحانه وتعالى بصفات نقص بشريه" بس بزمتك ايه رأيك في التصوير و الالوان التحفه والموسيقي التصويرية و الحوار و اداء الممثلين
نشر اي شيء من المسلسلات دي علي سبيل مدح اي جانب من جوانب صناعتها غلط وده ترويج للفكر الي داخل المسلسل بحجج مالهاش اي قيمه عند ربنا .. هنقف يوم القيامه نقول لربنا سبحانه وتعالى أصل الحوار كان عاجبني اصل الممثلين كان أدائهم عالي
رمضان بقى شهر تزييف الدين مش شهر طاعة وعبادة وتقوى و رجوع لله .. مش بس مسلسلات بترفض الفقة و اصول الدين و ثوابته لا مسلسلات تانية بتميع الدين و بتنشر أفكار "مش جديدة اصلا" بس تم دحضها من مئات السنين لما ظهرت .. الاسلام ظهر فيه فرق كتير علي مر تاريخه منها الي اضاف للدين بدع او شال منه ومنها الي الف دين جديد لكن مبني علي الاسلام زي طريقة عمل الزبادي لازم تيجيب زبادي واحدة جاهزة!.
شخصيا مش بتفرج علي مسلسلات عربية بقالي اكتر من 6-7 سنين كدة و بطلت المسلسلات الاجنبية بالكليه من اكتر من شهرين الا اني طبعا بشوف الكوميكس الي بتتعمل علي المسلسلات و منشورات الاخرين.
في مسلسل .. الممثل طالع في دور شيخ متسهوك ممحون عمال يقول كلام في الدين حلو معسول الا ان مضمونة غلط و مخالف للدين و الي هو كل حاجة بالحب و القلب و ربنا رحيم وكلنا بنغلط عادي مافيش مشكلة بس كلة بالقلب و الحب! .. ومطلعين الشيوخ او الجانب الاخر الي معارض للكلام ده مطلعنهم ناس حرامية وكلامهم غليظ طبعا انا شفت بتاع 10 دقايق متفرقة من حلقات مختلفة علشان افهم بيقولوا اية بس المسلسل مش محتاج اكتر من كدة علشان تعرف انه مجرد احياء ونشر لفرق اسلامية ظهرت من مئات السنين و المسلسل دة تحديداً عن "الإرجاء" او تصوف ممحون متسهوك مبتدع علي اقل تقدير و الله أعلم.
المُرجئة يإختصار شديد الممثل قال فكرهم في مشهد "عظيم" تصوير موسيقى مع اني شايف انه فيك ومش عارف يعمل الدور اصلا معظم الوقت .. قالك بما معناه كل شيء بالقلب و وضوء القلب زي الايدين و الرجلين و ان اي حد يعمل اي حاجة غلط انت مالك خليك في نفسك ربنا الي هيحاسبة.
المشكلة ان ناس كتير مفكرة ان دة مسلسل بيحبب الناس في الدين "الصح" الي هو النسخة الي المسلسل بيروج ليها الي ممكن تعمل فيها الكبائر بالاجهار و عادي المهم قلبك مستحمي ونضيف!
قالك عرفات مش شيخ.. عرفات جاهل .. طيب يا جاهل بتتكلم لية وتكمل المشهد تتكلم عن ثوابت الدين بعد الجملة دي!
الناس دي جاية من كل حدب وصوب مش سايبين اي مدخل لتغير عقيدة المسلمين الا وبيدخلوا منه .. ماعجبكش "انا عايزة كلام ربنا مش كلام الفقة" .. هيعبجك كلام ممحون و متسهوك زي "افرحوا ياشباب واتبسطوا واستبشروا خير متخافوش ولا تحزنوا عيشوا وافرحوا اشتغلوا واكسبوا" و "القلب له وضوء.. زي ما فيه وضوء للإيدين والراس والرجلين"
وعلشان ماحدش يفهم غلط .. الكلام دة ممكن يكون في كلام ظاهرة صح زي مثلا ان وضوء القلب ممكن يكون بتلاوة القرأن لكن هما مش بيقولوا كدة هما يقصدوا انك توصل لمرحلة قلبية روحيه بتنجانية انك تحب وتعشق الدين بس تحبه وتعشقه بس ماتعملش بيه ولا بأحكامه و ربنا هيتوب عليك وتدخل الجنة اصلك حبيته!