المقاطعة الرياضية للعدو الصهيوني - طب ما يلاعبه و يكسبه!
تطبيع العرب مع الصهاينة هو هدفهم الأساسي من ساعة ماختاروا ارض فلسطين لإحتلالها .. مافيش كيان/دولة في العالم عايزة او يقدر تعيش في حرب مع الدول الي حواليها ويكون شعبها مكروه بالشكل دة طول الوقت.
هتكلم عن الالوبيمباد الي فاتت لان دي كان اول مرة يحصل تطبيع رياضي مع دول خليجية خصوصا السعودية .. لاعبة سعودية قررت تلاعب لاعبه صهيونية .. تعالوا نوضح شوية حقائق مش هدفها التقليل من مجهود اي شخص نهائيا لكن دي ارقام وحقائق واضحة.
١- تاريخ الوطن العربي كلة مش "خرافي" في الالومبياد واحنا بنروح من ١٩١٢ يعني ٤٠ سنة قبل اول مشاركة الإحتلال الصهيوني وقبل دول كبيره كتيييير كمان .. اكتر دولة عربية معاها مدليات هي مصر بعدد ٣٢ ميداليا منهم ٩ فقط دهب "ايران و تركيا و إثيوبيا وكينيا وجنوب أفريقيا حتي كوريا الشمالية" كل دول سابقنا بمرااااااحل فاهدوا من الحماسة بتاعتكم شوية .. اة الأجيال الحالية منهم ناس بتحقق وهتحقق انتصارات بإذن الله بس انا بتكلم عن النهاردة.
٢- الإحتلال الصهيوني أيضا مالوش اي لازمة ولا تاريخ محترم في الأولمبياد معاه ١٠ مدليات منهم ٨ برونز واحدة دهب و واحدة فضة.
من النقطتين السابقتين يبان لينا ان موضوع اصلك هتنسحب وتسيبهم يكسبوا وبلا بلا بلا دة اي كلام لان اصلا الطرفين مش محققين اي انجاز خرافي دة غير ان في لاعيبة اخرين مش بمجرد رفض منافستنا ليهم هيكسبوا البطولة!
٣- لا مش تطبيع انك تستخدم الفيسبوك الي بيأيد الصهاينة .. دي نقطة جدلية اتزرعت هي وغيرها في مناقشتنا علشان نحسن ان التطبيع لا مفر منه و اننا اصلا مطبعين حاليا ودة غير حقيقي بالمرة، دة حتي لو اشتريت منتج "بالصدفة" ولاقيته مصنوع عندهم دة مش تطبيع! .. التطبيع ليه تعريف واضح جدا من حركة المقاطعه وسحب الاستثمار و فرض العقوبات الفلسطينية BDS
تقدروا تكتبوا علي جوجل تعريف التطبيع BDS هتلاقوا علي موقعهم و هضيف رابط في الاخر.
٤- موضوع رفع العلم و اصل كدة الصهاينة هيرفعوا العلم لما يفوزوا! .. ماتقلقش كدة كدة كل الاعلام بتترفع عادي ومافيش اي اهمية لرفع العلم لأن شيء طبيعي بيحصل من مئات المشاركين ودة مش بيغير من صورة الاحتلال الصهيوني وجرائمة في عيون الناس الي شايفينه مجرم اصلا .. لو فجأه اسرائيل بقى معاها ١٠٠ ميدالية ذهبية دة مش بيغير اي شيء .. الكون مش بيشتغل بالطريقة دي.
٥- العرب الوحدين الي مش عايزين يدخلو السياسية في الرياضة قال يعني كدة ناس متحضرة وبتفهم (بلا وكسه) ** السطر دة كتبته في يوليو 2021 قبل حرب أوكرانيا**
دي قايمة مختصره بالاحداث السياسية داخل الاولمبياد
١٩٣٦ اسبانيا قاطعة الأولمبياد في برلين علشان خلافات سياسية مع ألمانيا النازية .. في نفس البطولة امريكا ماكنتش هتبعت بعثتها علشان هتلر وسياستة ضد اليهود لكن بعتوهم علشان يثبتوا نقطة سياسية مش علشان رياضة ومنافسات وكدة
١٩٥٦ هولندا و اسبانيا و السويد قاطعوا الأولمبياد في استراليا علشان غزو الاتحاد السوفيتي للمجر / مصر ولبنان والعراق قاطعوا الأولمبياد نفسها علشان العدوان الثلاثي علي مصر (مش كان اولى نروح نلعب ونكسبهم ونرفع علمنا بلابلابلابلا)
في نفس السنة الصين رفضت تلعب قدام تايوان لأن الصين لا تعترف ان تايوان دولة لغاية النهاردة تايوان بتلعب تحت اسم تايبيه الصينية ومش بيستخدموا علمهم
١٩٦٤ اللجنة الدولية الأوليمبية قررت منع جنوب افريقيا من المشاركة من سنة ١٩٦٤ الي ١٩٩٢ بسبب نظام الفصل العنصري الي كان قائم ساعتها .. حد يقولهم ان إسرائيل نظام فصل عنصري اقبح من جنوب افريقيا!
١٩٦٨ اولمبياد المكسيك ١٠ ايام قبل بدايتها الحكومة المكسيكية قتلت ٢٦٧ طالب في مظاهرات وساعتها لاعبيين كتير سحبوا نفسهم من المنافسة
تم استغلال الأولمبياد لسنين في السياسة بين امريكا و الاتحاد السوفيتي اثناء الحرب الباردة منها مقاطعة امريكا لألمبياد ١٩٨٠ في موسكو ( الاتحاد السوفيتي) بسبب غزو الاتحاد السوفيتي لأفغنستان .. حتي ان كارتر رئيس امريكا ساعتها بعت الملاكم المعروف محمد علي لكذا دولة أفريقية يقنعهم يقاطعوا وبعد ٤ سنين الاتحاد السوفيتي قاطع الالمبياد في امريكا.
٢٠٢٢ دعوات سياسية أوروبية وأمريكية لمقاطعة الألعاب الأولمبية الشتوية في بيكين اعتراضا علي اوضاع مسلمي الاويغور في معتقلات الصين.
دة غير كتير من لحظات رفع علم معين او إشارة معينة بالايد او لبس تيشيرت معين للتعبير عن موقف سياسي ودة بيحصل كتير.
السياسة طول عمرها موجودة في الاولمبياد و للرياضة عموما ومش هتختفي في اي وقت قريب.
*القضية الفلسطينية ليست مجرد سياسية لكن انا بحاول اوصل ردي علي اللناس الي مفكرة ان مافيش سياسية في الرياضة!
٦- نرجع بقي لموضوعنا هل ننسحب ولا نلاعبهم؟
رأي الشخصي ان يكون دة قرار الاعب نفسة علشان يتحمل هو تبعاته .. لكن احنا كامتفرجين لازم .. ايوة لازم نشجع ونأيد وندعم الي بيفضلوا يضحوا بتعبهم لسنين من اجل القضية الفلسطينية وبيرفضوا التطبيع ومنافسة الصهاينة .. وعلي الطرف الاخر مش المفروض نشتم ولا نجرح في الي يقرر يشارك هو او هي حريين .. لكن شخصيا لا اتمني لهم الفوز لان دة هيكون زي حافز للاعبين اخرين انهم يطبعوا بهدف انهم يهزموهم لكن دة غير منطقي لان الاحتمال دايما ٥٠% .. لازم ناخد بالنا ان ساعات بيتم ارغام لاعيبة عرب علي المشاركة قدام صهاينة لأسباب سياسية وطبعا بيكون القرار جاي من فووووق.
٧- طيب اية الي احنا استفدناه واية الي هما خسروا من عدم مشاركتنا معاهم؟
اولا استفادتنا اننا عندنا شرف وكرامة "انا عارف ان دول مش كفايه عن ناس معينة"
ثانيا هدفنا هو اننا نوصلهم انهم مهما عملوا اتفاقيات مع الحكومات هنفضل كاشعوب نبذينهم لانهم محتلين و بيقتلوا اهلنا كل يوم في فلسطين "مش علشان هما يهود زي ما للاسف مننا كتير عندها اعتقاد غبي و خاطيء"
طيب هما خسروا اية؟
خسروا الوصول لهدفهم وهو التطبيع الشعبي الكامل و تغير صورتهم في عقولنا وان يتم التعامل معاهم بشكل طبيعي او اقل من الطبيعي حتي اي علاقة وخلاص يقدروا يبيعوها لشعبهم وللصهاينة حول العالم انهم وصلوا للسلام مع الشعوب الي حواليها وانهم اخيرا بقوا مش مكروهين وان تعالوا بقي لأرض الميعاد الآمنة تماما.
انت جبت الكلام دة منين؟
من نتنياهو هو قاله بنفسة علي التلفزيون في مداخلة في ٢٠١٦ علشان يهني لاعب الجودو الصهيوني "المنتصر" علي لاعب الجودو المصري "الخسران" والي رفض مصافحة الاعب الصهيوني بعد نهاية الماتش
المذيعة: بالتأكيد شاهدت الاعب (اوري) وهو يمد يده للاعب الجودو المصري، الذي رفض ان يمد له يده .. كيف رأيت ذالك؟
نتنياهو: رأيت بأن هذه هي إسرائيل الحقيقية، رأيت بإنه علي الرغم من العلاقات الجيدة الآخذة في التطور بيننا وبين دول في منطقتنا، الا انه لازال امامنا عمل كبير من أجل تغيير الدعاية المروعة ضدنا، والتي تركمت علي مدار السنين .. *وأنا مُصرّ علي هذا التغيير، وسيأتي هذا اليوم بإذن الله*
المذيعة: لكن دعنا نتفق بأن(اوري) تصرف في هذا الموقف كالملك
نتنياهو: انتصر ثم مد يده، هذة هي اسرائيل الجميلة و القوية.
لحظة تاريخية:
رياضيه سعوديه ستنافس رياضيه إسرائيليه في الألعاب الأولمبية
تتنافس لاعبة الجودو السعودية تهاني القحطاني مع نظيرتها الإسرائيلية هيرشكو راز
منذ الصباح الباكر التالي للمباراة جميع حسابات إسرائيل الدبلوماسية الرسمية وغيرها عندهم أمر بكتابة نفس التويتة والي مفادها ان بصوا هي دي الروح الرياضية الاعبة الإسرائيلية نافسة الاعبة السعوديه وعلي الرغم من ان "إسرائيل" فازت الا ان الاعبتين تعانقا في نهاية المباراة
ملحوظة: الاعبه الإسرائيلية خسرت هي كمان و روحت برضو لكن ماحدش اصلا مهتم بدة .. الحدث الاهم هو التطبيع.
انا لما بقول حسابات مش بتكلم عن افراد او صحافة، دي حسابات كلها رسمية تابعة لوزارة خارجيتهم وبيتم ترجمة التويتة للغات كتير.
احنا لسة في بداية اليوم حول العالم الغربي و افريقيا علشان كدة لسة القائمة بسيطة وهي كالتالي:
الحساب الرسمي المتحدث بإسم اسرائيل
حساب سفارتهم في جمهورية التشيك
حساب سفارتهم في بلجيكا
حساب سفارتهم في ايرلندا
حسابهم الموجه لـ الفاتيكان
حساب سفارتهم في الكاميرون
حسابهم الموجه للإتحاد الأوروبي
حساب سفارتهم في هولندا
حساب سفارتهم في كرواتيا
حساب سفارتهم في كندا
حساب سفيرهم للأمم المتحدة
حساب سفارتهم في بنما
حساب سفارتهم في جمهورية الكونغو الديمقراطية
حساب مدير عام وزارة الخارجية 3 تويتات عبرية و عربية و انجليزية
حسابهم الموجه للنرويج
حساب سفيرهم لبلجيكا
حساب سفارتهم في بلغاريا
حساب سفارتهم في البانيا
حساب سفارتهم في الهند
دة كلام الاعبة الاسرائيلية للصحافة بعد المباراة
"أنا سعيده بحدوث هذه المباراة. بعد المباراة تحدثنا قليلا في القاعة لكنها [القحطاني] لم ترغب في أن يصورها الإعلام. تصافحنا واحتضننا ، وتحدثنا عن المباراة وعن الوضع في بلدها ".
"أخبرتها أنني اتفهم ، وأنها كانت شجاعة. أنا سعيد لأنها وقفت في النهاية ، على الرغم من كل شيء ، وقاتلت كما ينبغي. وأضافت هيرشكو "أنا سعيده لأن الرياضة انتصرت". المصدر
عرفتوا انهم استخدموا الماتش في الدعايا لوجودهم ولقبولنا لمنافستهم واعترافنا بيهم؟
عرفتوا ان الانسحاب بيحرمهم من دعايا مجانية لكيانهم حول العالم؟
عرفتوا انهم هيموتوا و نبصلهم بس؟.
عرفتوا ان الابطال الي انسحبوا كانوا علي حق؟
لا للتطبيع بأي شكل .. خصوصا الشعبي.
طبعا المنشور دة كتبتة في 2021 قبل حرب اوكرانيا وروسيا وطرد روسيا من كاس العالم و منتخبات زي السويد و بولندا مش عايزين يلاعبوا روسيا في التصيفيات بسبب السياسة مهو الحرب سياسية!
**بولندا بتقول هناك أشياء أهم من كرة القدم**
ويجي بعد كل دة واحد حمار يقولك
طيب ما يلاعبة ويكسبة!